வெண்ணாற்றின் வடகரை ஓரமாக கிழக்கு நோக்கிய ராஜகோபுரம் 3 நிலைகளை கொண்டது. வெண்ணாற்றின் படித்துறையை ஒட்டிய தெற்கு கோபுரமும் 3 நிலை உடையதாகும். கிழக்கு வாயிலின் எதிர் நிலையில் அழகிய திருக்குளம் நீர் இன்றி காட்சி அளிக்கின்றது. வெண்ணாற்றில் நீர் செல்லும் போது இந்த திருக்குளத்தில் நீர் நிரம்புமாறு அமைக்கப் பட்டிருந்த நீர் தடம் சிதைந்து போனதால் திருக்குளம் தற்போது வற்றியுள்ளது. முன்னதாக, லட்சுமி ராஜ புரம் மக்களின் அனைத்து தேவைகளுக்கும் மற்றும் கோவிலின் தீர்த்தவாரி உற்சவங்களுக்கும் இந்த திருக்குளத்தின் புனித நீரே பயன்பாட்டில் இருந்ததாகவும் செவிவழி செய்திகள் கூறுகின்றன. மேலும் வடகரையை ஒட்டி லட்சுமிபாய் ராஜாமணி அம்மாள் அரண்மனையும் அன்னதான மண்டபமும் சீருடன் அமைந்துள்ளது. ப்ரதிதினமும் பூஜைகளும் சாதுக்களுக்கு அன்னதானமும் தவறாது நடைபெற்று வந்ததாக வரலாற்று குறிப்புகள் இயம்புகின்றன. அரண்மனையின் எதிரே மஹான் ஸ்ரீ வாசுதேவானந்த சரஸ்வதி ஸ்வாமிகள் எனப்படும் டேம்பே ஸ்வாமிகளின் மண்டபம் கட்டப்பட்டுள்ளது. தெற்கு மகாராஷ்டிரா  சாவந்த்வாடி சமஸ்தானத்தை சார்ந்த மணகாவ் கிராமத்தில் தோன்றிய டேம்பே ஸ்வாமிகள் தனது வாழ்நாளில் பாரத தேசம் முழுவதும் நடைபயணம் மேற்கொண்டார். தனது 17வது சாதுர்மாஸ்யத்தினை 1907 வருடம் வேணு நதி எனப்படும் வெண்ணாற்றங்கரையில் காவிரியின் கிளை நதியில் தங்கியிருந்தது குறிப்பிடத்தக்கது. அப்போது கிருஷ்ணா லஹரி மற்றும் த்விஷா ஹஸ்ரி சூர்ணிகா ஆகிய காவியங்களுக்கு விளக்கவுரை இயற்றினார். இந்த மண்டபம் சந்தியா மண்டபம் என்று அழைக்கப்படுகின்றது. பௌர்ணமி மற்றும் சுவாமிகளின் உகந்த நாட்களில் சிறப்பு பூஜைகளும் அன்னதானங்களும் இன்று வரையிலும் நடைபெற்றுக்கொண்டிருக்கிறது.

அக்ராஹாரத்தின் நடுவிலுள்ள திருக்கோயிலின் கிழக்குகோபுர வாசலின் உள்ளே நுழைந்தால் பலிபீடம் மற்றும் அதிகார நந்தி மண்டபம் அமைக்கப்பட்டுள்ளது. தஞ்சை பிரகதீஸ்வரர் கோயில் நந்தியின் தோற்றத்தை ஒட்டிய நந்தியும் மண்டபத்தின் மேற்கு மூலையில் கணபதியும் வடக்கு மூலையில் சனிஸ்வரனும் ஸ்வாமியை நோக்கியவாறு அமைக்க பட்டுள்ளது. தனியாக நவகிரஹ மண்டலம் இன்றி உருவாய் அருவாய் உளதாய் இலதாய் என்ற வரிகளுக்கு ஏற்ப எம்பெருமானே இங்கு அனைத்து சக்தியாகவும் இருப்பது கோயிலின் தனி சிறப்பு.  நந்தி மண்டப தெற்கு மதிலின் உட்புறம் பல ஆண்டுகளாக அன்னதானம் செய்தருளிய மடைப்பள்ளியும், வடக்கு மதிலில் இணைந்த கண்ணாடி மண்டபமும் காட்சி அளிக்கின்றன. கிழக்கு மதிலின் உள்புறம் ஸ்வாமியை நோக்கியவாறு சூர்யன் மற்றும் யோக பைரவரின்  மண்டபங்கள் அமைக்க பட்டுள்ளது. அதிகார நந்தி மண்டபத்தின் தூண்கள் நாயக்கர் மன்னர் கால முறைப்படியும் அங்கு காணப்படும் வண்ண பூச்சுகள் மராட்டிய முறைப்படியும் ராஜகோபுரம் மற்றும் மண்டப கூரைகள் மற்றும் சுதை சிற்பங்களும் நமது சோழ காலத்து முறைப்படியும் சேர்ந்து தனி பொக்கிஷமாக இன்றும் சிறந்து விளங்குகின்றது.

அதிகார நந்தியை கடந்து த்யான மண்டபத்தினுள் நுழைந்தால் கிழக்கு நோக்கியவாறு ஸ்ரீ தளிகேஸ்வர ஸ்வாமி  பலிபீடம் மற்றும் நந்தியுடன் காட்சிஅளிக்கின்றார். எப்போதும் நாக படத்துடன் இருப்பதால் இக்கோயில் நாக தோஷ நிவர்த்தி ஸ்தலமாக போற்றப்படுகின்றது. மேலும் சில ஆண்டுகளுக்கு முன்னர் கிழக்கு வாயிலில் புற்று இருந்ததாகவும் அதில் இரு நாகங்கள் வசித்ததாகவும் மக்களால் பூஜை செய்யப்பட்டுவந்ததாகவும் புற்று தற்போது நசிந்துள்ளதாகவும் ஒரு நாகம் மட்டும் கோயிலின் உள்ளே சில முறை காணப்படுவதாகவும் ஊர் மக்களால் செவிவழி செய்தியாக கூறப்படுகின்றது.